இந்த உலக வாழ்வு

பாபர் மசூதி கடந்து வந்த பாதை,

பாபரி பள்ளிவாசல் கடந்து வந்த பாதை

 (1528 முதல் 2019 அக்டோபர் 17 வரை)

1528

முகலாய பேரரசர் பாபரின் தளபதி மிர் பக்கி என்பவரால் பாபரி பள்ளிவாசல் கட்டப்பட்டது.

1885 ஜனவரி 19

ரகுபார்தாஸ் என்பவர் ஒரு வழக்கை பதிவு செய்கிறார். அதில், பாபரி பள்ளிவாசல் பக்கத்தில் உள்ள வளாகத்தில் கோவில் கட்ட அனுமதி கேட்கிறார்.

1885 பிப்ரவரி 24

ரகுபார்தாஸ் தொடர்ந்த வழக்கில் அனுமதி தர முடியாது என தீர்ப்பு வெளியானது. ஆனால் இந்த தீர்ப்பில் பாபரி பள்ளிவாசலுக்கு அருகில் இருக்கும் இடம் மனுதாரருக்கு(ரகுபார்தாஸ்)க்கு சொந்தம் என்று தவறாக குறிப்பிடப்பட்டிருந்தது.

1886 மார்ச் 26

மேல்முறையீடாக பைசாபாத் நீதிமன்றம் சென்றார் ரகுபார்தாஸ். விசாரித்த நீதிமன்றம் வழக்கை தள்ளுபடி செய்த்து. நிலம் ரகுபார்தாஸுக்கு சொந்தமல்ல என்றும் தீர்ப்பளித்தது.

1886 மே 25

அயோத்யா நீதி ஆணையத்தில் ரகுபார்தாஸ் முறையீடு : நீதிமன்றங்களின் தீர்ப்பு சரியென்று உத்தரவு பிறப்பிக்கப்பட்டது. (பின்னர் 1934 வரை எந்த பிரச்சனையும் அயோத்யாவில் இல்லை)

1934 மார்ச் 27

அயோத்யாவில் நடந்த வகுப்பு கலவரம் ஒன்றில் பாபரி பள்ளிவாசலின் சில பகுதி சேதமடைந்தன. பின்னர் அரசே இதனை சரி செய்து கொடுத்தது.

1949

பாபரி பள்ளிவாசலுக்குள் சட்டவிரோதமாக ராமர் சிலை வைக்கப்படுகிறது. முஸ்லிம்கள் தங்கள் வழிபாடுகளிலிருந்து தடுக்கப்படுகிறார்கள்.

1950

கோபால் சிம்லா விசாரத், பாபரி பள்ளிவாசலுக்குள் வைக்கப்பட்ட சிலையை வணங்க அனுமதி கேட்டு பைசாபாத் மாவட்ட நீதிமன்றத்தில் வழக்கு தொடுக்கிறார்.

1950

பரஹம்ச ராமசந்திர தாஸ் பள்ளிவாசலினுள் வைக்கப்பட்ட ராமர் சிலைக்கு வழிபாடுகள் தொடர வேண்டும் என்று கோரி வழக்கு தொடர்கிறார்.

1959

நிர்மோகி அகாரா பாபரி பள்ளிவாசலின் கையப்படுத்தப்பட்ட நிலத்தில் தனக்கும் உரிமை கோரி வழக்கு தாக்கல் செய்கிறது.

1981

உத்திரபிரதேச சன்னி வக்பு போர்டு நிலம் முஸ்லிம்களுடையது என்று நீதிமன்றத்தில் உரிமை கோருகிறார்கள்.

பிப்ரவரி1 , 1986

கீழ் நீதிமன்றம், இந்துக்கள் பாபரி பள்ளிவாசலினுள் வைக்கப்பட்ட சிலையை வணங்க கதவை திறந்து விடுமாறு தீர்ப்பு வழங்குகிறது.

ஆகஸ்ட் 14,1989

அலகாபாத் உயர்நீதிமன்றம் இதுவரை எப்படி பாபரி பள்ளிவாசல் பாதுகாக்கப்பட்டு வந்ததோ அதே போல் தொடரும்(status quo) என்று தீர்ப்பு  அளித்தது. அங்கே நடைபெற்றுக் கொண்டிருக்கும் பூஜைகளும் தொடரும் என்பது தான் தீர்ப்பின் அம்சம்.

டிசம்பர் 6, 1992

பாபரி பள்ளிவாசல் இந்துத்துவ தீவிரவாதிகளால் திட்டமிட்டு தரைமட்டமாக்கப்பட்டது.

டிசம்பர் 10, 1992

பாபரி பள்ளிவாசல் இடித்த பிறகு அங்கு சட்டவிரோதமாக இந்துக்களின் வழிபாட்டுக்காக ஒரு கட்டடம் எழுப்பபடுகிறது.

1993

பாபரி பள்ளிவாசல் இடிக்கப்பட்டு சட்டவிரோதமாக உருவாக்கப்பட்ட கோவிலில் வழிபடும் உரிமையை இந்துத்துவ சக்திகள் நீதிமன்றத்தின் மூலம் பெற்றனர்.

1993

இஸ்மாயில் ஃபாருகி, அலகாபாத் உயர்நீதிமன்றத்தில் அயோத்தி சட்டத்தின் பல்வேறு பிரிவுகளை எதிர்த்து வழக்கு தொடர்ந்தார்.

அக்டோபர் 24,1994

உச்சநீதிமன்றம் இஸ்லாமியில் ஃபாருகி தொடர்ந்த வழக்கில், பள்ளிவாசல் இஸ்லாமிய மதத்துடன் ஒருங்கிணைந்த ஒன்றல்ல என்று தீர்ப்பளித்தது.

ஜூலை 2000

 பாபரி பள்ளிவாசல் தொடர்பான முக்கிய இரண்டு கோப்புகளை எடுத்து சென்ற சுபாஷ் என்ற நேர்மையான அதிகாரி மர்மமான முறையில் கொலை.

பிப்ரவரி 12, 2001

அத்வானி, முரளி மனோகர் ஜோஷி உள்ளிட்ட 8 பேர் மீது பாபரி பள்ளிவாசல் இடிப்பு தொடர்பாக தொடுக்கப்பட்ட வழக்கை அலகாபாத் உயர்நீதிமன்றம் தள்ளுபடி செய்தது. 

ஏப்ரல் 2002

உயர்நீதிமன்றம் கையகப்படுத்தப்பட்ட பாபரி நிலம் யாருக்கு சொந்தம் என்ற விசாரணையை தொடங்கியது.

2003

மார்ச் 13

உச்சநீதிமன்றம் அஸ்லம் பூரே வழக்கில், கையகப்படுத்தப்பட்ட எந்த நிலத்திலும் மத வழிபாடுகள் நடத்துவதற்கு அனுமதி கிடையாது என தீர்ப்பு வழங்கியது.

மார்ச் 14

வகுப்புவாத நல்லிணக்கத்தை பேணுவதற்காக அலகாபாத் உயர்நீதிமன்றத்தில் உள்ள சிவில் வழக்குகள் முடியும் வரை இடைக்கால உத்தரவு செயல்படும் என உச்சநீதிமன்றம் தீர்ப்பளித்தது.

செப்டம்பர் 30, 2010

கையகப்படுத்தப்பட்ட நிலத்தை மூன்று பகுதிகளாக பிரித்து ஒரு பகுதியை முஸ்லிம்களுக்கும், மற்ற இரண்டு பகுதியை இந்துக்களுக்குமானது என்று அநீதியான தீர்ப்பு வழங்கியது உயர்நீதிமன்றம்.

மே 9, 2011

உயர்நீதிமன்றத்தின் பாபரி பள்ளிவாசல் தொடர்பான தீர்ப்பை உச்சநீதிமன்றம் நிறுத்தி வைத்தது.

பிப்ரவரி 26,2016

உச்சநீதிமன்றத்தில் கையகப்பட்டுத்தப்பட்ட பாபரி பள்ளிவாசல் நிலத்தில் ராமர் கோவில் கட்ட வேண்டும் என சுப்ரமணிய சுவாமி வழக்கு தொடர்ந்தார்.

2017

 மார்ச் 21

உச்சநீதிமன்ற தலைமை நீதிபதி கெஹர், பாபரி பள்ளிவாசல் விவகாரத்தை நீதிமன்றத்திற்கு வெளியே பேசி முடித்துக்கொள்ளும் படி அறிவுறுத்தினார்.

ஆகஸ்ட் 7

அலகாபாத் உயர்நீதிமன்றத்தின் 2010 தீர்ப்பை எதிர்த்து உச்சநீதிமன்றத்தில் தாக்கல் செய்யப்பட்ட மனுவை விசாரிக்க மூன்று நீதிபதிகள் கொண்ட பெஞ்ச் அமைக்கப்பட்டது.

ஆகஸ்ட் 8

கையகப்படுத்தப்பட்ட பாபரி பள்ளிவாசல் நிலத்திலிருந்து சற்று தொலைவில் முஸ்லிம் ஆதிக்கம் நிறைந்த இடத்தில் பள்ளிவாசல் கட்டலாம் என்று உத்திபிரதேச ஷியா பிரிவினர் உச்சநீதிமன்றத்தில் கூறினர்.

செப்டம்பர் 11

கையகப்படுத்தப்பட்ட பாபரி பள்ளிவாசல் நிலத்தில் பராமரிப்பை மேற்கொள்வதற்கு இரண்டு கூடுதல் மாவட்ட நீதிபதிகளை உச்சநீதிமன்றம் நியமித்தது.

நவம்பர் 20

உத்திரபிரதேச ஷியா பிரிவினர் உச்சநீதிமன்றத்தில் கோயிலை அயோத்யாவிலும், மசூதியை லக்னோவிலும் கட்டலாம் என்று கூறினார்கள்.

டிசம்பர் 1

அலகாபாத் உயர்நீதிமன்ற தீர்ப்பு 2010ஐ எதிர்த்து 32 சிவில் உரிமை ஆர்வலர்கள் உச்சநீதிமன்றத்தில் மனு தாக்கல் செய்தனர்.

டிசம்பர் 5

அயோத்தி மேல்முறையீட்டு இறுதி விசாரணை அப்போதைய உச்சநீதிமன்ற தலைமை நீதிபதி  தீபக் மிஸ்ரா நீதிப்திகள் அசோக் பூசன், அப்துல் நசீர் அவர்களின் கீழ் தொடங்கியது.

2018

பிப்ரவரி 8 2018

உச்சநீதிமன்றம் சிவில் வழக்குகளின் விசாரணையை தொடங்கியது.

மார்ச் 14

இந்த வழக்கில் இடைக்கால கோரிக்கையாக வந்த அனைதது வழக்குகளையும் தள்ளுபடி செய்தது உச்சநீதிமன்றம்.

ஏப்ரல் 6

வழக்கறிஞர் ராஜீவ் தவான் 1994 தீர்ப்பின் சில அம்சங்களை மறுபரீசலனை செய்யுமாறு உச்சநீதிமன்றத்தில் வழக்கு தொடர்ந்தார்.

ஜூலை 6

உத்திரபிரதேச மாநில அரசு, உச்சநீதிமன்றத்திடம் ராஜீவ் தவான் தாக்கல் செய்த வழக்கை சுட்டிக்காடி சில முஸ்லிம் குழுக்கள் 1994 தீர்ப்பை மறுபரீசலனை செய்யக்கோரி விசாரணையை தாமதப்படுத்த முயல்கின்றன என்று குற்றம் சாட்டியது.

ஜூலை 20

வழக்கு ஒத்திவைக்கப்பட்டது.

செப்டம்பர் 27

இந்த வழக்கை ஐந்து நீதிபதிகள் கொண்ட பெஞ்சிற்கு பரிந்துரைக்க உச்சநீதிமன்றம் மறுத்து விட்டது, மேலும், அக்டோபர் 29ம் தேதி புதிதாக அமைக்கப்பட்ட மூன்று நீதிபதிகள் கொண்ட அமர்வு மூலம் இந்த வழக்கு விசாரிக்கப்படும் என்று அறிவிக்கப்பட்டது.

அக்டோபர் 29

உச்சநீதிமன்ற தலைமை நீதிபதி ரஞ்சன் கோகாய் தலைமையிலான மூன்று நீதிபதிகள் கொண்ட அமர்வு பொருத்தமான நீதிபதிகளின் அமர்வின் முன்னால் விசாரணை தொடங்கப்படும் என அறிவிக்கப்பட்டது.

2019

ஜனவரி 4

மீண்டும் பொருத்தமான நீதிபதி அமர்வு முன்னிலையில் மேல்முறையீடு எடுத்துக்கொள்ளப்படும் என அறிவிக்கப்பட்டது.

ஜனவரி 8

தலைமை நீதிபதி தலைமையில் ஐந்து நீதிபதிகள் கொண்ட அமர்வு ஜனவரி 10ம் தேதி விசாரிக்க தொடங்கும். மேலும், அடுத்த தலைமை நீதிபதியாகும் பட்டியலில் உள்ள நீதிபதிகள் போப்டே, ரமணா, லலித், சந்திரசூட் போன்றோர்கள் தான் இந்த அமர்வில் அங்கம் வகிப்பார்கள் என்றும் அறிவிக்கப்பட்டது.

ஜனவரி 10

நீதிபதி லலித் இந்த விசாரணை அமர்விலிருந்து தன்னை விலக்கிக் கொண்டார்.

ஜனவரி 29

நீதிபதி போப்டே மருத்துவ விடுமுறையில் சென்று விட்டார். நீதிபதிகள் ரமணா மற்றும் லலித் ஆகிய இருவருக்கு பதிலாக நீதிபதிகள், அசோக் பூசன் மற்றும் அப்துல் நசீர் சேர்க்கப்பட்டனர்.

பிபரவரி 20

பிப்ரவரி 26 விசாரணைக்காக அமர்வு பிப்ரவரி 26ம் தேதி கூடும் என அறிவிக்கப்பட்டது.

பிப்ரவரி 26

அயோத்தி பிரச்சனையை தீர்ப்பதற்கு நீதிமன்ற கண்காணிப்புடன் இந்து மற்றும் முஸ்லிம் அமைப்புகளுக்கு இடையில் மத்தியஸ்த செயல்முறையை உச்சநீதிமன்றம் அறிவுறுத்தியது. அதே போல், அயோத்தி வழக்கின் பதிவுகளின் மொழிப்பெயர்ப்புகளை ஆராய முஸ்லிம் அமைப்புகளுக்கு எட்டு வாரங்களுக்கு அவகாசம் வழங்கப்பட்டது.

மார்ச் 8

மத்தியஸ்தம் செய்வதற்கான குழு உருவாக்கப்பட்டது. முன்னாள் நீதிபதி கலிபுல்லா அவர்களை தலைமையாக கொண்ட குழுவில் ஆன்மிக தலைவர் ஸ்ரீ ஸ்ரீ ரவிசங்கர், மூத்த வழக்கறிஞர் ஸ்ரீராம் பஞ்சு ஆகியோர் இருந்தனர்.

ஆகஸ்ட் 2

மத்தியஸ்தம் குழு தோல்விய்டைந்ததாக உச்சநீதிமன்ற நீதிபதி தலைமையிலான அமர்வு தெரிவித்தது. இதன் தொடர்ச்சியாக வழக்கின் விசாரணை ஆகஸ்ட் 6 முதல் தினசரி நடைபெறும் என்று தெரிவிக்கப்பட்டது.

ஆகஸ்ட்6

விசாரணை தொடங்கியது: பாபரி பள்ளிவாசலுக்கு சொந்தமான 2.77 ஏக்கர் நிலத்தை மூன்று பகுதிகளாக பிரிக்கப்பட்டதை எதிர்த்த வழக்கின் விசாரணை. நிர்மோஹி அகாரா பாபரி பள்ளிவாசலின் மையப்பகுதியில் ராமர் பிறந்த இடம் இருப்பதாக கூறி உரிமை கோருகிறது.

ஆகஸ்ட் 7

“இயேசு பெத்தல்ஹமில் தான் பிறந்தாரா என்று எந்த நீதிமன்றத்திலாவது வழக்கு நடந்திருக்கிறதா?” என நீதிபதி கேட்க, இந்துத்துவா தரப்பின் வழக்கறிஞர், “ அசைக்க முடியாத நம்பிக்கையே ராமர் பிறந்த இடம் என்பதற்கான” பெரிய அதாரம் என்று கூறினார்.

ஆகஸ்ட் 20

மசூதியில் உள்ள கல்வெட்டு விஷ்ணு கோவிலை பற்றி பேசுகிறது என உச்சநீதிமன்ற அமர்வு தெரிவித்தது.

ஆகஸ்ட் 22

ராமரின் பிறப்பிடமாக “நம்பப்படும்” ஒரு இடத்தில் வணங்குவதற்கு இந்துக்களுக்கு உரிமையுண்டு என்று மேல்முறையீட்டு மனுதாரர் கோபால் சிங் விஷாரத் தெரிவித்தார்.

ஆகஸ்ட் 28

பாபர் இந்த பள்ளிவாசலை கட்டியிருக்க மாட்டார் உச்சநீதிமன்றம். இந்த்துத்துவ தரப்பில் ஆஜரான வழக்கறிஞர் பாபர் அயோத்யாவிற்கு வந்ததே இல்லை என்ற வாதத்தின் அடிப்படையில் இந்த கருத்து கூறப்பட்டது.

செப்டம்பர் 14

ஒரு பக்தனின் நம்பிக்கையை கேள்வி கேட்க முடியாது.

செப்டம்பர் 19

முஸ்லிம்கள் தரப்பு வழக்கறிஞர் ராஜீவ் தவான், இந்துக்களின் தரப்பில் வாதிடும் அனைவரும் சட்ட ஆதாரங்களை காட்டுவதை விட ஆன்மிக நம்பிக்கைகளை தான் பேசுகின்றனர்.  ஒரு கட்டத்தில் நீதிமன்றத்தில் வெறுப்பு ஏற்பட்டு, “ இறையியல் பெயரில் ஒருவித ஆக்கிரமிப்பு நடப்பதை உணர முடிகிறது” என்றார்.

செப்டம்பர் 25

தொல்லியல் துறையின் இறுதி முடிவில் எந்த ஆதாரமும் குறிப்பிடப்படவில்லை என உச்சநீதிமன்றத்தில் வாதாடிய முஸ்லிம் தரப்பு வழக்கறிஞரை கண்டித்து இதனை அலகாபாத் நீதிமன்றத்தில் கூறியிருக்கலாம். இங்கே அனுமதி இல்லை என்று மறுத்து விட்டனர் நீதிபதிகள்.

அக்டோபர் 17

பாபரி பள்ளிவாசலின் வழக்கின் விசாரணை அக்டோபர் 17 உடன் நிறைவடைந்தன.  இந்தியாவின் உச்சநீதிமன்ற தலைமை நீதிபதி ரஞ்சன் கோகாய் நவம்பர் 17ல் பணி ஓய்வு பெறுவதால் அதற்குள் வழக்கின் தீர்ப்பு வந்துவிடும் என எதிர்பார்க்கப்படுகிறது.

மேலும் "வைகறை 

வெளிச்சம் நவம்பர் 2019"

தீர்ப்பு வந்தது

10/10/2019 ராமர் கோயில் கட்டும் பொறுப்பை ஆர்எஸ்எஸ் சார்பாக உச்சநீதிமன்றமே சிரமேற்கொண்டு இருப்பதுதான் தீர்ப்பின் சாரம் !

 

பத்திரிக்கைச் செய்தி

நாள் : 09.11.2019

ராமர் கோயில் கட்டும் பொறுப்பை ஆர்எஸ்எஸ் சார்பாக உச்சநீதிமன்றமே சிரமேற்கொண்டு இருப்பதுதான் தீர்ப்பின் சாரம் !

சட்டத்தின் ஆட்சி, மதச்சார்பின்மை மட்டுமல்ல சிறுபான்மை இஸ்லாமிய மக்களின் நம்பிக்கையும் நொறுக்கப்பட்டு இருக்கிறது.அரசின் அனைத்து அதிகார பீடங்களும் பாசிசமயமாகிக்கொண்டு இருக்கும் இச்சூழலில், இந்த  நாட்டில் நீதியை நீதிமன்றம் பெற்றுத்தரும் என்று 70 ஆண்டுகளாக வழக்காடியவர்களுக்கும் அதை நம்பியவர்களுக்கும் தான் இத்தீர்ப்பு பெருத்த ஏமாற்றத்தை கொடுத்து இருக்கும். மோடியின் 2.0 பாசிச ஆட்சியில் இதை விட வேறு  நியாமான தீர்ப்பை எப்படி எதிர்பார்க்க முடியும்?. இனி சிறுபான்மை மக்களுக்கான இடம் எது என்பதை இத்தீர்ப்பின் மூலம் அரசு நிறுவியிருக்கிறது. நவம்பர் மாதம் ராமர் கோயில் கட்டுவதற்கான பணிகள் தொடங்கப்படும் என்று சுப்ரமணிய சாமி கூறியது போலவே தீர்ப்பும் வழங்கப்பட்டு இருக்கிறது. 

 அயோத்தி பாபர் மசூதி இருந்த இடம் யாருக்குச் சொந்தம்  என்ற வழக்கில் தீர்ப்பளித்த உச்சநீதிமன்றம், அந்த இடத்திலேயே  இராமர் கோயில் கட்ட வேண்டும் என்ற தீர்ப்பை வழங்கியிருக்கிறது. ஆர்எஸ்எஸ் விரும்பிய தீர்ப்புதான் வரும் என்பதற்கான எல்லா அறிகுறிகளையும் மோடி அரசும் யோகி அரசும் சில நாட்களாகவே வெளிப்படுத்தி வருவதை அனைவராலும் எளிதில் உணர முடிந்தது.

உ.பி யோகி அரசு பெருமளவு போலீசை குவித்தது மட்டுமின்றி எட்டு தற்காலிகச் சிறைகளையும் உருவாக்கியது. உச்ச நீதிமன்றத்தின் தலைமை நீதிபதியே உ.பி காவல்துறை தலைவர்களை அழைத்துப் பேசினார். இம்மாதம் 13, 14, 15 ஆகிய தேதிகளில் தீர்ப்பு வரலாம் என்று செய்தி பரப்பப்பட்டதற்கு மாறாக திடீரென (இன்று ) ஒன்பதாம் தேதி என அறிவிக்கப்பட்டது. கிட்டத்தட்ட இஸ்லாமியர்களை அச்சத்தில் உறைய வைத்துவிட்டு இத்தீர்ப்பு வெளியிடப்பட்டிருக்கிறது.

பாபர் மசூதி இருந்த இடமான 2.77 ஏக்கர்  (1500 சதுர மீட்டர்) நிலம் யாருக்கு சொந்தம் என்பது தான் வழக்கு ஆனால் அதை விட்டுவிட்டு ராமர் கோயில் கட்ட உத்தரவிட்டிறுக்கிறது. இந்த இடத்தை யாரும் உரிமை கோர முடியாது, அது அரசுக்குச் சொந்தம் என்று கூறிவிட்டு, மூன்று மாதத்திற்குள் ஒரு அறக்கட்டளை ஏற்படுத்தி அந்த மொத்த இடத்தையும் அதனிடம் ஒப்படைத்து ராமர் கோயில் கட்டும் பணிகளை மேற்கொள்ள வேண்டும் எனத் தீர்ப்பு அளிப்பது என்ன நியாயம்? ராமr அயோத்தியில் பிறந்தார் என்பது தான் இந்துக்களின்  நம்பிக்கையே, தவிர பாபர் மசூதி இருந்த இடத்தில் தான் பிறந்தார் என்பது அல்ல. அயோத்தியில் இன்றும் பல ராமர் கோயில்களில் பூசாரிகள் தங்கள் கோயிலில்தான் ராமன் பிறந்தான் என்று கூறிவருகின்றனர். ராமன் அயோத்தியில் பிறந்தான் என்பது அடிப்படையற்ற நம்பிக்கை.ஆனால் பாபர் மசூதி 450 ஆண்டு ஆதாரத்துடன் கூடிய உண்மை வரலாறு.

இந்துக்களின் தரப்புக்கு இவ்வளவு தெளிவாக உத்தரவிட்ட நீதிமன்றம் இஸ்லாமியர்களுக்கு வேறு இடத்தில் ஐந்து ஏக்கர் ஒதுக்க வேண்டும் அதில் சன்னி வக்பு வாரியம் மசூதி கட்டிக் கொள்ளலாம் என ’கருணை’ காட்டி பாதிக்கப்பட்ட இசுலாமியர்களுக்கும் நியாயம் வழங்கியிருப்பதாக பாசாங்கு செய்திருக்கிறது . இத்தீர்ப்பு. ராமர் கோயில் கட்டும் பொறுப்பை ஆர்எஸ்எஸ் சார்பாக உச்சநீதிமன்றமே சிரமேற்கொண்டு இருப்பதுதான் தீர்ப்பின் சாரம்.பாபர் மசூதி இரண்டாவது முறையாக உச்ச நீதிமன்றத்தால் கரசேவை செய்யப்பட்டிருக்கிறது.

ஓராண்டுக்கு முன் இப்போதைய உச்ச நீதிமன்றத் தலைமை நீதிபதி உள்ளிட்ட நான்கு மூத்த நீதிபதிகள் அரசியல் அழுத்தத்திற்கு உச்ச நீதிமன்றம் ஆட்பட்டிருப்பதை அம்பலப்படுத்தினர். அது உண்மைதான் என்பதை இந்தத் தீர்ப்பு மூலம் மெய்ப்பித்திருக்கிறார்கள்.தனது அரசியல் எதிரியான ப.சிதம்பரத்தை பழிவாங்க மொத்த நீதித்துறையையும் எப்படி மோடி அரசு ஆட்டி வைக்கிறது என்பதை நாடே பார்த்துக் கொண்டிருக்கிறது.

ஆர்எஸ்எஸ் - பாஜக வின் விருப்பங்களை மீறி எந்த நீதிமன்றமும் செயல்பட முடியாது என்பதுதான் இன்றைய எதார்த்தம். நாடு முழுவதும் தனது பாசிச அதிகாரத்தை நிலைநாட்ட தேர்தல் உள்ளிட்ட அனைத்து பெயரளவு ஜனநாயகத்தையும் ஒழித்து வருகிறது  பார்ப்பன  - பாஜக கும்பல்.

இன்று மராட்டியத்தில் வெட்கமற்ற முறையில் குதிரை பேரத்தில் இறங்கி இருக்கிறது வரலாறு காணாத பொருளாதார நெருக்கடியில் சிக்கி தவிக்கும் நிலையில் அது பற்றிமூச்சுவிடாமல் ஒரே நாடு ஒரே தேர்தல் ஒரே கல்வி திட்டம், தேசப்பாதுகாப்புக்கு ஆபத்து, பயங்கரவாத அச்சுறுத்தல் என்று பீதியூட்டி  பாசிச ஒடுக்குமுறைக்கான அடித்தளத்தை உருவாக்குகின்றனர். மக்களின் அடிப்படை உரிமைகளை நீதிமன்றங்கள் பாதுகாக்கும் என்பதற்கான அடிப்படை தகர்ந்து கொண்டே வருகிறது. இது அபாயத்தின் அறிகுறி. அயோத்தியோடு இது ஒரு போதும் நிற்கப்போவதில்லை. எனவே ஆர் எஸ் எஸ்- இந்துமதவெறி பாசிஸ்டுகளை . எதிர்த்து முறியடித்துத்தான் நியாயத்தை நிலைநாட்ட முடியும்  என்பதையே  உச்சநீதிமன்றத்தின் தீர்ப்பு தெளிவுபடுத்தியிருக்கிறது.

தோழமையுடன்

தோழர் காளியப்பன்

மாநிலப்பொருளாளர்

மக்கள் அதிகாரம்

தமிழ்நாடு - புதுவை